Mela Casal recibe o premio de honra Fernando Rey da AGA

A Academia Galega do Audiovisual (AGA) decidiu homenaxear co Premio de Honra “Fernando Rey” de 2019 á actriz e dobradora galega Mela Casal polo seu “traballo a prol da construcción do audiovisual galego dos últimos trinta anos, ser unha das nosas pioneiras e un dos rostros máis coñecidos do noso audiovisual”.

Mela Casal naceu en Boqueixón, en 1948. Fíxose popular para os espectadores galegos polo seu papel da alcaldesa de Portozás, Celia Rei, na serie Mareas vivas e posteriormente foi unha das protagonistas doutras serie de ficción de éxito da TVG, A vida por diante, emitida entre xaneiro de 2006 e decembro de 2007. Os espectadores e espectadoras da Televisión de Galicia lembrarana tamén de emblemáticas ficcións como Rías Baixas, Pratos combinados, Padre Casares e Terras de Miranda, sen esquecer o seu papel de Socorito en Luar. En televisión ten colaborado ademais noutras producións como Nada es para siempre ou a recentemente multipremiada Fariña (Antena 3).

Entre os filmes nos que participou destacan títulos como Sei quen es, de Patricia Ferreira, no 2000, O lapis do carpinteiro de Antón Reixa no 2003, O ano da carracha, de Jorge Coira, no 2004, ou Vilamor (2008) e A Esmorga (2014), ambas de Ignacio Vilar. Mela, que estivo presente nas producións televisivas dende os inicios da TVG, tamén desenvolveu gran parte do seu traballo no ámbito teatral en diversas obras do Centro Dramático Galego, Teatro Bruto, Pifano Teatro e Redrum Teatro. Polo seu papel na montaxe “Noiteboa”, desta última, fíxose co María Casares á mellor actriz protagonista no 2016.

Mela Casal recibirá o Premio Fernando Rey durante a Gala dos Mestre Mateo, que terá lugar no Pazo da Ópera da Coruña o sábado 2 de marzo.