A Asociación Cultural Arela informa que desde hoxe e ata o 15 de marzo está aberto o prazo de admisión de curtametraxes e videoclips galegos para participar na sétima edición do Festival de Cans, que se celebrará do 19 ao 22 de maio na aldea de Cans (O Porriño). O Festival de Cans entregará este ano 5.600 euros en premios, ao que se suman os Cans de Pedra, estatuíñas co emblema do festival realizadas polo artesán canteiro local Paco Candán. En total entregaranse 9 galardóns: seis para curtametraxes, dous para videoclips e un premio honorífico. A pesar de que a crise económica tamén afecta ao festival a nivel de apoios e patrocinios, Cans fará un esforzo para volver apoiar as curtas galegas coa dotación económica dos premios.
Curtametraxes
No que se refire ás curtametraxes hai dúas categorías a concurso: curtas de ficción e curtas de animación. Os premios do xurado en ambas categorías están dotados con 1.500 euros, e con 1.000 euros os premios do público. O festival entrega tamén outros dous premios sen dotación económica: o de mellor actriz e mellor actor segundo o xurado. Ademais outórgase o Premio Pedigree a algunha persoa do audiovisual galego destacada pola súa traxectoria. Para a súa participación no Festival de Cans, as curtametraxes deben estar feitas en Galicia, producidas por unha produtora galega ou dirixidas por directores/as galeg@s, e producidas nos anos 2008, 2009 ou 2010. A copia debe presentarse en formato DVD e non exceder os 30 minutos de duración. Xunto á curta enviarase unha ficha técnica, imaxes dixitais do cartel e dun fotograma e os datos de contacto.
Videoclips
No que se refire aos videoclips, o certame estará aberto a aqueles de músic@s ou grupos galegos e aos dirixidos por realizadores/as galeg@s. Deben ser dos anos 2008, 2009 ou 2010. Neste apartado hai dous premios ao mellor videoclip: o que outorga o público e o que entrega o xurado. Cada un deles recibirá 300 euros, ademais do Can de Pedra.
Envío das producións
Os autores ou produtores de curtametraxes e de videoclips que estean interesados en que as súas producións participen no festival deben enviar unha copia ao seguinte enderezo:
Asociación Cultural Arela
Apartado de Correos 232
C.P. 36.400, O Porriño.
As bases da convocatoria pódense consultar na web www.festivaldecans.com. Para calquera consulta pódese escribir ao email festival@festivaldecans.com.