O xoves 31, a partir das 22.30 horas, proxectarase o programa A Volta ao Mundo, unha selección das mellores curtas internacionais. Os sete traballos que se verán no parque de Bonaval suman máis de 100 premios en festivais de todo o mundo.
Curtocircuíto na Rúa, o ciclo de curtas ao aire libre organizado pola Concellaría de Promoción Económica, Emprego, Comercio e Turismo e a Concellaría de Cultura, presenta o programa A Volta ao Mundo que se proxectará o xoves 31 de xullo no Cemiterio de Bonaval a partir das 22.30 horas. O programa componse de sete curtametraxes internacionais gañadoras de máis dun centenar de premios.
Un xoves máis, os espectadores de Curtocircuíto na Rúa terán a oportunidade de decidir cos seus votos cal será a curta gañadora do Premio do Público que se entregará na Gala de Entrega de Premios que clausurará o Festival o 24 de outubro.
En caso de choiva, Curtocircuíto na Rúa trasladase á Praza de Abastos, os cambios anunciaranse na web do festival www.curtocircuito.org a mañá do xoves.
O ciclo de curtas, organizado pola concellaría que dirixe o nacionalista Xosé Manuel Iglesias, continúa en agosto, cando se proxectará unha selección de curtas do Festival de Clermont-Ferrand, vídeos musicais e as mellores curtas feitas en España.
O 28 de agosto na Praza da Quintana, o DJ Ollie Teeba, do grupo The Herbaliser, e os VJs galegos D-Rndm ofrecerán unha sesión única de videocreación en directo que porá punto final ás actividades de verán de Curtocircuíto.
O festival compostelán regresará na súa Semana Oficial de outubro con máis curtas, obradoiros de formación, exhibicións, o III Mercado Internacional de Curtas e moitas outras actividades relacionadas co cinema de curta duración.