A Coruña clausurou este fin de semana a VI edición da Semana do Cinema Galego, unha celebración cinematográfica non competitiva que exhibe os títulos finalistas a mellor longametraxe e mellor documental dos XXIII Premios Mestre Mateo.
Un total de oito filmes foron proxectados no Teatro Colón entre o mércores 26 e o sábado 29, que se ofreceron de forma gratuíta ao público. A Semana do Cinema Galego repetiu éxito de público un ano máis. A IV edición mantén a liña de edicións pasadas cunha media de 300 espectadores por xornada.
Toda as proxeccións estiveron acompañadas por presentacións dos equipos dos filmes, que compartiron co público anécdotas das rodaxes e experiencias. As presentacións, moderadas polo programador Javier Trigales, ofreceron interesantes conversas sobre o proceso creativo e as particularidades de cada traballo. Estes encontros favoreceron o intercambio entre cineastas e espectadores, facendo da Semana do Cinema Galego un espazo de reflexión e diálogo sobre a creación audiovisual galega.
Os títulos exhibidos foron Salvaxe, salvaxe, de Emilio Fonseca; As Neves, de Sonia Méndez, Premio Mestre Mateo a Mellor Longametraxe; Aurora, de Arena Erina; Prefiro condenarme, de Margarita Ledo; + Cuñados, de Luis Avilés; Filmei paxaros voando, de Zeltia Outeriño, Premio Mestre Mateo a Mellor Documental: Honeymoon, de Enrique Otero e Xustiza artificial, de Simón Casal.
A VI Semana do Cinema Galego está impulsada pola Academia Galega do Audiovisual e conta co apoio do Concello da Coruña e da Deputación da Coruña.