A delegación de once empresas socias do Clúster Audiovisual Galego, CLAG, que permanecen desde o pasado venres en Amsterdam para asistir á Exhibition IBC 08, baixo o paraugas corporativo do CLAG, continúan co seu calendario de reunións e xornadas de traballo para a promoción e difusión do audiovisual nesta cidade holandesa ata o 16 de setembro. O cine dixital, a televisión para móbiles ou a distribución de contidos multimedia a través de Internet (IPTV) son algúns dos temas que se están a abordar no IBC no que os membros da delegación do CLAG están tendo a oportunidade de asistir ás demostracións dos provedores máis relevantes deste sector.
O IBC 08 de Amsterdam é o mercado da tecnoloxía da industria do entretemento máis importante de Europa e un dos máis salientables do mundo, considerado punto de referencia para a industria do sector. Baixo o lema “Pola industria, para a industria”, este evento é un relevante acontecemento mundial para os profesionais da creación, xestión e entrega de contidos da industria do entretemento.
A feira IBC está consolidada como unha das principais citas para os profesionais dedicados á creación e direción de contidos para o entretemento. IBC ten un carácter eminentemente profesional, no que se combina a exposición de novidades nun gran número de stands, cun programa de conferencias diario e actividades de valor engadido para que os visitantes poidan achegarse a algunhas das novas tecnoloxías.
Considerando a relevancia deste mercado para o sector audiovisual galego, o CLAG promoveu este ano, por primeira vez, a presenza das súas empresas asociadas no IBC, desprazándose representantes das compañías galegas: Arantia, Spica, Isabella Audiovisual, Filmanova, Ficción Producciones, LambdaStream, Voz Audiovisual, Continental, Cinemar Films, CTV e Tecnocom.