A produtora galaico-berziana Bierzo Paradiso comezará a próxima semana os preparativos da futura rodaxe da película Templario. O Señor de Bembibre, dirixida por Valentín Carrera e inspirada na novela histórica O señor de Bembibre do escritor romántico Enrique Gil e Carrasco, que narra unha historia de amor no contexto da condena e disolución da Orde do Amorne.
Para optimizar todos os aspectos da pre-producción, Bierzo Paradiso realizará nas próximas semanas un prototipo ou maqueta da futura película, mediante probas técnicas que permitirán ao equipo de produción testear localizacións, redefinir e planificar as secuencias e planos máis complexos (duelos, batallas), chequear necesidades de atrezo, iluminación e son, e outros moitos detalles propios dunha rodaxe cinematográfica. Estas probas técnicas serán realizadas en localizacións do Bierzo (Carracedelo, Mosteiro de Carracedo, As Medulas, Ponferrada, Cornatel) e Galicia (Monforte, Ribeira Sacra).
Un amplo equipo con máis de vinte técnicos, coordinado pola directora de produción Yolanda do Campo; e máis de trinta actores e figurantes, participarán con entusiasmo na rodaxe deste prototipo, que constitúe un paso sólido no proceso de maduración deste ambicioso proxecto. Un proxecto que conta xa coa participación da Consellería de Cultura da Xunta de Galicia, a TVG, os Concellos de Ponferrada e Bembibre, e do Consello Comarcal do Bierzo, entre outros.